La Usc di Ladins

En chësc ann sarál avisa 225 agn da canche le popul de Tirol á renové süa crëta al Cör de Gejú. Por i Scizeri da La Pli é chësta stada la ocajiun da mëte en pe na aziun, che é piada ia rodunt en Pasca.
"I esperc dles religiuns dij, che les raisc dla veneraziun dl Cör de Gejú vá zoruch cina tl vedl testamënt. I esperc de storia indere detlarëia, che l’origina stá tl mëteman dl tëmp modern." Insciö mët man la brosciüra, che i Scizeri d’La Pli de Mareo á fat, por comemoré i 225 agn dala veneraziun dl Cör de Gejú. Al é na storia lungia doia, che mët man tl vedl testamënt y ciafa so sbunf tl’eté medievala. La veneraziun dl Cör de Gejú festejunse nos vigni ann – n’edema do Les Antles – cun chël ch’i nes metun sön le iade y jun en prozesciun, por inultima te dlijia cianté "Auf zum Schwur, Tiroler Land". Pa chësc argomënt tol i scizeri sambëgn ite na gran importanza, n’é pa chisc stá dal 1796 a fá danü l’impormetüda y spo tl 1809 a renové l’alianza cun le Cör de Gejú.
Insciö foss l’ann 2021 n ann important por le cristianesim, deache la storia ciara zoruch a 225 agn, da canche i tirolesc – sot a André Hofer – s’á indô recordé dl Cör de Gejú. I scizeri á insciö orü sambëgn i dé atenziun y na gran importanza a chësc aniversar, mo n iade n pü’ atramënter, impede co ma – desch’al é usanza por l’uniun – stlopeté na salva. Te chësc contest á le comandant Michael Ploner orü miré le fin, da i mostré sö ala jënt tla Val Badia, che i scizeri n’é nia ma na uniun che marcëia impara pa prozesciuns, oron insciö tigní alalt les tradiziuns tirolejes y la cultura da inlaóta, mo ince na uniun che pënsa al proscim y dantadöt a nosta jënt ladina.
Cun chësc fin é piada ia na aziun de spënores, cun chëra che an ó daidé jënt manco fortunada de nüsc paisc. Les spënores vëgn coiüdes adöm sön n cunt aposta, tl comun de Mareo ince te bossi metüs fora por locai desvalis. Ci che vëgn trat ite, i gnará surandé en la festa dl Cör de Gejú al proiet "Cörs dla Val Badia".

Deplü sön l’aziun ciafëise t’La Usc di Ladins di 4 d’aurí.