La rezeta de na bona preza da Pasca pó ti garaté a dötes y düc, nia ma a cöghes y coghi.
Ingrediënc por le lové
25 grams de lové assöt
1 cazü de zücher
100 ml de lat (mez n gote)
Ingrediënc
View the embedded image gallery online at:
https://www.lausc.it/valedes-ladines/val-badia/15310-na-preza-por-le-signe-da-pasca#sigProId96d65368d9
https://www.lausc.it/valedes-ladines/val-badia/15310-na-preza-por-le-signe-da-pasca#sigProId96d65368d9
300 grams de farina
40 grams de smalz lüter (deleghé)
50 grams de zücher
2 üs
1 scarnüz de zücher de vanila
scorza de limone gratada
1 stamperle de rum
n dëit de se
Fà le lové
Sfrogoré le lové (gherm) te na ola, mëte lapró le zücher y le lat (düc i ingrdiënc dess ester ciöbi) y moscedé. Curí la ola y lascé crësce le lové por n chert d’ora te n post bun cialt (35 degrá al plü).
Fá la pasta
Juté düc i atri ingrediënc (farina, smalz, zücher, üs, zücher de vanila, scorza de limone, rum y se) tl lové y maoscedé sö. Mené la pasta dassënn cina che al sará da odëi flocores, spo la lascé curida ciamó por 15 – 20 menüc, te n post cialt – la pasta dess crësce feter le dopl.
Spo él da despartí la pasta te trëi perts, fá i brodi y i intrecé (poscibilmënter bele sön le testl da cöje). La trëcia mëss sëgn crësce curida ciamó por 15 – 20 menüc. Sce an ó pón ti dé jö n ghel dl ü sbatü denant co la mëte te furn a 160 – 180 degrá por apresciapüch 40 menüc.
Consëis
La rezeta spligada é por arjigné na preza dër scëmpla, sambëgn pón la arichí ince cun d’atri ingrediënc:
üapasa: më te ademblagn n pügn de üapasa te rum o te ega, la injunté ai ingrediënc da fá la pasta
trëi saus: canche an despartësc la pasta te trëi perts pón moscedé pro vignöna val’ d’ater, sciöche graní de zuculada, nusc o nojeles majinades, früc sëc, yii.
le lové: por ajigné ca le lové ne désson mai tó lat massa cialt, ajache al brüj le gherm y ti tol la forza da fá crësce la pasta.
l’aspet: la preza ciara fora plü bel sce an ti mët süch de zücher y graní de zücher suraía canche an la tol fora de furn.
bona cialda: canche an tol la preza fora de furn spo féjera sambëgn gola y la tentaziun é grana. Al é sciode che la preza ciamó cialda crësc inant, le magun ne l’á porchël nia massa ion y se rebelëia gonot cun n bel me. (Iaco Rigo)