La Usc di Ladins

Dancà él fat sö la crusc cun ti ćês dl lëgn deplü simboi: le simbol de Crist "PX" (che é les lëtres greches pronunziades "r" y "h" por Christòs), dui iadi l’alfa y l’omega (la pröma y l’ultima lëtra dl alfabet grech) y a pé le caresc, simbol dla pasciun y mort de Gejù Crist. Paralelamënter al lëgn orizontal stàl le "missale romanun", le liber dl rit ciristian-catolich cun sentè lassura l’agnel pascal, simbol dla Pasqua cristiana. I ebraics sacrificâ n agnel pro les gran ocajiuns, agnel che é spo deventè pro i pröms cristians simbol dl sacrifize de Gejù. La pasca ebraica recorda la liberaziun di ebraics da la stlavité d’Egit, la Pasca cristiana se lié a chësta tradiziun cun recordè la ressoreziun de Gejù desco la liberaziun dal pićé y dala mort eterna. Sön tröpes mëses cristianes röia da Pasca ćern d’agnel desco past.
Sön la pìlora da Pasca dl 1912 stàl spo scrit - metü tl ladin: Ël é davëi l’Agnel che à tut demez i pićià dl monn, ël, che morin, à desdrüt nosta mort, y, rosserin, à reparè nosta vita (dal Mess. Rom.).
Söla pert rodosa dla cherta pascala él metü jö na oraziun y sotìa les indicaziuns dla indulgënza emanada da Papa X, ai 16 de jügn dl 1906. L’oraziun ea da dì sö n iade al dé por 300 dis alalungia, traduziun tl ladin dla oraziun: Cör de Gejù dër sant, jutede fora ponjes ostes benedisciuns söla Dlijia, le Pere Sant y döt le cil; convertide i pićiadus, iluminede chi che n’é nia fedei. Benedide nosta parentela, amisc y benefaturs; stedi dlungia ai morënć, liberede les armes dal purgatore y sternede fora sura düć i cörs la potënza ducia de osta ćiarité. Insciö déssera ester.
Tles indicaziuns él inće scrit cô che an mëss fà por arjunje la indulgënza plëna n iade al mëis ("indulgenza plenaria"): dì chësta oraziun en intenziun dl Papa, jì ala comuniun y ala confesciun.

Retrac:
La "pìlora da Pasca" dla ploania da San Martin de Tor dl 1912, la pert dancà y la pert rodosa.