La Usc di Ladins

Do la ordinaziun a Porsenú ai 28 de jügn dl 2020, do la mëssa noela ai pröms de messé y do mëisc de preparaziun tl’Irlanda, s’arjigna sëgn le miscionar combonian siur Stefano Trevisan da pié ia tles misciuns. Sciöche öna dles ultimes tapes tocâ ciamó le mandat ofizial da pert dl Vësco Ivo Muser, che é gnü zelebré y festeje en sabeda tla dlijia da Milland, sënta di combonians de nosta provinzia y consacrada al gran miscionar ladin Sant Ujöp Freinademetz.
La santa mëssa é gnüda zelebrada dal Vësco, cun la conzelebraziun de plü proi, danter chisc sambëgn le miscionar instësc, sciöche ince le degan dla Val Badia siur Iaco Willeit y le miscionar siur Gustl Frenademez da La Ila. Baldi n’á i combonians instësc nia podü ester ala pert, por gauja dl Covid che tichinëia i abitanc dla ciasa da Milland; insciö manciâl al apel ince siur Hans Maneschg da Cianëi, compaesan de siur Stefano y combonian consacré 52 agn denant. Impó él garaté na mëssa sintida, che é gnüda abelida da n grup de ciantarines y sonadus sot la direziun de Clara Sattler, cun l’orghelist Franz Comploi al orghe de dlijia. "Das ist der Tag" é le toch intoné dal mëteman dla zelebraziun. Por siur Stefano êl veramënter n de simbolich, che le dëida forsc bel plan da tó comié da süa tera y süa jënt, por jí a operé tla tera olache le Signur l’á cherdé.

T’La Usc di Ladins di 15 d’aurí ciafarëise deplü sön chësta funziun sintida. Lapró ti unse damané al miscionar siur Stefano co che al á passé chisc ultims mëisc, ci che al á fat tl’Irlanda y sce al sint ince tëma da jí te na tera tichinada sciöche le Sudan dl süd.  (pablo)