La Usc di Ladins

Le brac de fer danter i duelanc por la presidënza nöia Robert Steger (Ombolt da Prettau) y Josef Gräber (rapresentant dl Comun da San Laurënz) á pordü la forza inier, n de dan la reuniun costituënta da incö (la secunda y dezisiva do chëra dër debatüda stada ai 23 de forá 2021): Josef Gräber á trat zoruch cin’ menüc dan les dodesc süa candidatöra ti arjignan insciö la pole-position a Robert Steger.

Robert Steger á anunzié danfora tla sentada virtuala menada dal mëmber plü ti agn Iaco Frenademetz, a chëra che al á tut pert 34 delegá sön 34 (por la maiú pert ombolc y rapresentantes di comuns), che al se candidëia a presidënt nü ciaran a döta la comunité de val, y preodon proscimamënter na mudaziun dl statut dla Comunité de val de Puster por alzé i rapresentanc te junta da 5 a 7. Al momënt rapresentëia i 5 rapresentanc i 5 raiuns geografics prinzipai, cun ala pert ince la Val Badia sciöche raiun a pert. Cun l’ampliamënt di "assessurs dla comunité de val" a 7 saltassel spo ince fora la poscibilité da avëi tl dagní dui vizepresidënc/tes cun de dovëi 1 ladin/a. Esenziala por le dagní vëiga le presidënt nü la colaboraziun y la vijinanza danter i comuns de Puster, chëra che n’é nia tres dada tla vita da vigni de y tla politica di comuns y di proiec soziai.
Ala fin é süa proposta de junta passada, cun chisc mëmbri y chëstes rapresentantes:
Robert Steger – presidënt (Ombolt da Prettau)
Margherita Schöllberger – rapr. Puster Bas (Aconsiadëssa de comun da Chiens)
Rita Moling – rapr. Val Badia (Assessuria ala cultura y al sozial dl Comun da La Val)
Roland Grießmair – rapr. Bornech y Puster Zentral (Ombolt da Bornech, ex presidënt dla Comunité de Puster, su referënt tla junta nöia cun esperiënzes atives ti organns plü alc dla Comunité de val) 
Friedrich Mittermair – rapr. Puster Alt (Ombolt de Braies)

Deplü é stades les critiches ala previjiun dl presidënt nü da ti dé la vizepresidënza a Friedrich Mittermair de Braies impede ala rapresentanta ladina Rita Moling. I cater ombolc dla Val Badia, Iaco Frenademetz – Robert Rottonara – Giorgio Costabiei y Felix Ploner – á damané a na manira tlera che Rita Moling ciafass la vizepresidënza, é pö i Ladins le grup de mendranza y ciafass cun Rita Moling les ëres na conscideraziun relevanta. Mo le candidat a presidënt Robert Steger á ma salpü da incontenté chëstes ghiranzes cun impormëte la mudaziun al statut che podess spo mëte a desposiziun dui scagns da vize. Na consolaziun che resta al momënt scrita tles stëres, o dit damí: ti papiers dla burocrazia por damané do le bëgnsté iuridich chiló y iló, por ne tomé nia tres tla jungla dles leges y rapresentanzes dl proporz etnich!  (Iaco Rigo)