La Usc di Ladins

Cuaji vigni de gnunse confrontá cun resultac che vëgn da döt le monn y che reverda le cambiamënt climatich. Nia impormó tres le movimënt "Fridays for Future" él tler che düc adöm mëss fá val’ por tigní sö le cambiamënt climatich y sconé l’ambiënt. Por fá chësc, ne bastel nia ma da smendrí i gasc a efet serra y sparagné cun les ressurses energetiches, mo i messun ince s’arjigné ca ales conseguënzes de fenomens meteorologics estrems, tolon les dërtes precauziuns. Le Comun de Badia se impegnëia bele da plü agn te chësc ciamp, por ejëmpl tres le program "ComunClima" y n plan por la sconanza dl clima.

Comun Clima? N ajornamënt.
"Comun Clima" é n program che dëida i comuns da jí dl vers dla sostenibilité y sensibilisé la popolaziun por la sconanza ambientala. Tres na consulënza esterna vëgnel lauré fora y metü en forza provedimënc te chëstes categories: Planificaziun dl svilup y urbanistica; Frabicac y strotöres de comun; Fornidöra y desmandrada; Mobilité; Organisaziun interna; Comunicaziun y cooperaziun.
Da d’altonn dl 2019 á le Comun de Badia ciafé le zertificat de "Comun Clima Silver", comun clima d’arjënt. Chël ó dí che dal 2017 incá, ann che le Comun de Badia á metü man cun le program, él bele sté bun da arjunje tröp, chisc sforc é gnüs valutá dai auditors cun 51,6 punc porcentuai.

T’La Usc di Ladins di 16 d’aurí podëise lí deplü sön i mëmbri nüs dl "Team Energia" che fistidiëia dl proiet tl comun de Badia, y ince de n valgönes idees che an á por jí inant.  (Julia Gebhard, Ökoinstitut)