La Usc di Ladins

Al ê ai 12 de merz che al é pié ia le proiet de solidarieté "Cörs dla Val Badia", nasciü tres la colaboraziun danter porsones fora dal monn sozial, religius y economich dla Val Badia. Deplü é les manires cun chëres che al vëgn dé aiüt: tres les scafes te 13 botëghes de alimentars dla valada vëgnel coiü adöm alimentars che ti vëgn spo dá inant a families che á debojëgn, tres la racoiüda de spënores vëgnel surantut en pert o deplëgn fatures por families che é rovades te na situaziun de debojëgn. Lapró él la poscibilité da scinché ia bonns "Cörs dla Val Badia" y ince la jënt á la poscibilité da mëte a desposiziun talënc y aiüt por d’atri.
Sön les scafes dl mangé tles botëghes á la jënt veramënter metü sö n gröm de mangiaria, y dopró podunse dí che ara vá tres ciamó debojëgn. Deache le grup de laur s’imaginâ che tröc ne s’infida nia da se tó jö val’ te botëga – ince sce al é debojëgn – él gnü istituí döes bancareles dl mangé, olache la jënt pó storje pro te n ambiënt plü discret. Y chi che ne s’infida ciamó nia, pó telefoné a n numer, olache la spëisa ti vëgn spo condüta fora. Les bancareles dl mangé da San Martin y Al Plan é cina sëgn stades davertes 4 iadi, te chi che an á podü ti dé poc de spëisa a passa 100 families. A chëstes s’injunta ciamó chëres dla Bancarela de Badia, che vëgn manajada tres la Banca dl Tëmp y che ciafa ince benefiz tres les scafes. Iló él edemes che al storj pro passa 50 porsones.
Por ci che reverda les spënores, á la jënt dla Val Badia desmostré na mania dër leria. Cina en mercui êl gnü trat ite avisa 22.051,00€. Cun chëstes spënores vëgnel surantut daldöt o en pert cunc por bojëgns primars (afit, scialdé, forza eletrica, spëises sanitares etc.). Cina sëgn él gnü sostegní de chësc vers 9 families dla Val Badia, por na soma totala de 4.522,07€.
Dé aiüt é tla Val Badia na cossa feter naturala: la jënt mostra dagnora n gran cör de chësc vers. Damané aiüt é indere na cossa ciamó n pü’ nöia, olache tröpes porsones é spauies. Tröc ne s’infida nia da damané do por la tëma dal iudize da pert dla jënt, che é na burta coia te nüsc pici paisc. Dl ater vers él le grup de laur che alza fora che al vëgn tigní la discreziun sön i damanadus. Y iudiché ne vëgnel daldöt nia. Deplü á bele fat le vare da damané do, y ince ciafé. L’invit é y resta inant chël da vaghé le vare.

Deplü ciafëise t’La Usc di Ladins di 23 de aurí  (pablo)