La Usc di Ladins

Canche an baia de turism te nüsc paisc, spo röion tert o adora pro na tematica valgamia debatüda: le raport y le respet danter paurs y turism. Ester s’adoron intrami: le turism tira benefiz dai paurs che mantin la contrada y mët gonot a desposiziun trus por passé, i paurs tira benefiz dal turism cun la poscibilité da fá n secundo laur y ince por vëne sü produc, dër aprijá dai ghesć. Öna dles problematiches sintides dai paurs é zënzater chëra dl respet di terac privac, olache an vëiga sovënz porsones che ciapa fora por i prá a pe o cun les rodes, o lascia fá sü cians i bojëgns sön pastöra.
A vigni moda: bele l’ann passé da d’altonn á la Cooperativa Turistica Al Plan/San Martin fat na incuntada cun i rapresentanc di paurs por baié de chëstes chestiuns. Un n aspet olache la Cooperativa Turistica á sintí da podëi daidé, é la sensibilisaziun dla jënt a n dër comportamënt: sides canche ara roda cun le cian che ince canche ara s’armöi fora por la natöra y la contrada, gonot de patruns privac. Insciö él gnü lascé fá tofles y brosciüres, cun chëres che an ó informé y sensibilisé. Les tofles él i patruns de terac di comuns de Mareo y San Martin che pó jí a se do debann.

T’La Usc di Ladins di 23 de aurí ciafëise deplü sön chësta chestiuns, sön co che an pó fá da ciafé les tofles y ci che an ó arjunje cun la brosciüra.  (pablo)