La Usc di Ladins

Ala fin de merz él gnü fora tla "Pustertaler Zeitung" n inserat de laur olache al vëgn chirí de vigni sort de personal por n supermarcé nü che dess gní daurí a Al Plan. N inserat che á descedé bindebó de sciosciüre. Te Mareo savôn che al ê intenziuns da daurí n secundo supermarcé, mo nia che ara foss propi bele tan inant. La sozieté Ties A4 Gmbh, patrona dles frabiches dla vedla fabrich "August Ties" y terac incëria, â bele dl 2013 invié ia na mudaziun al plan urbanistich, por realisé sön le terac interessé ciases lëdies, alisirades, cuatiers por le personal y danter l’ater ince na botëga. Chësta mudaziun é gnüda aprovada dl 2014. Iniann é la chestiun indô atuala, deache an se dá jö por rové al’aprovaziun de n plan de atuaziun. La Comisciun dl Frabiché á bele traté n iade le proiet. Denanche rové ala daurida de n supermarcé dorarára indere ciamó n pez, deache le proiet mëss rové ciamó te Junta y ince te Consëi.
La Usc di Ladins á tla ediziun di 2 d’aurí publiché n articul sön chësc inserat demorvëia y le "Supermarcé misterius" che dess gní daurí. Sëgn respogn la sozieté Ties A4 Gmbh, che á mené ite na tuta de posiziun, olache al vëgn cunté plü avisa dl proiet y ince dles intenziuns che stá doía. La sozieté tol ince posiziun sön l’inserat publiché: "Cun chësta tuta de posiziun oresson stlarí n iade por dagnora che no i proprietars no le proietant savô dla publicaziun de chësc inserat, y tan demanco savôi de so contignü".

La tuta de posiziun deplëgn podëise lí t’La Usc di Ladins di 23 d’aurí  (pablo)