La Val Badia te na monografia

Data

04 de mei 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
»Meridiani Montagne« dedichëia na monografia ala Val Badia y a Sas dla Crusc
La ediziun numer 110 dla revista »Meridiani Montagne« é dedicada a Sas dla Crusc y ala Val Badia. La publicaziun é n foliet de 150 plates, garaté tres la colaboraziun cun l'ofize stampa de Alta Badia Brand, che á tut sö y coordiné le laur di jornalisć y di fotografs che é rová adalerch por relalisé la revista. Tröpes é les tematiches tratades. Al é articui dedicá al alpinism, mo ince ala natöra, ala vita da zacan, a nosta jënt, i Ladins, y ince a nosc lingaz y a nosta cultura. Dlungia les plates olache al vëgn scrit de crëps y de munts, olache al vëgn documenté p.ej. les imprejes de Reinhold Messner y de Simon Gietl sön i parëis de Sas dla Crusc, ti él ince gnü lascé lerch al'architetöra da zacan y ala ciasadafüch ladina, che da spëisa püra s'á alzé a n livel de gastronomia alta. Tres intervistes al diretur d'La Usc di Ladins Iaco Rigo y al diretur dl Istitut Cultural Ladin, Micurá de Rü, él gnü inrescí sön i Ladins y sön le ladin. Na pert dla revista é ince dedicada ales publicaziuns sön nosta val y nosta jënt, en particolar al liber de Renata Kostner Pizzinini, testimone importanta dl svilup dl turism te nosc raiun. Le turism, sciöche fontana de nosta economia, ciafa sambëgn ince lerch. I ghesć, o foresć sciöche le diretur dla revista Paolo Paci scri te so editorial, á n lian sterch cun la jënt dl post, na sort de acordanza. Te so comentar alza fora le diretur la forza de nosta jënt che vir de n' »industria turistica« nia minada tl sëns negatif. Al é n turism »da virtus«, sciöche Paci scri, che ne lascia nia jí sot la cultura, les tradiziuns y les usanzes. Recordan les parores de Ilda Pizzinini, presidënta onorara dla Uniun Generela di Ladins dles Dolomites, che dijô che »le turism á salvé i Ladins«, stlüj jö le diretur so editorial cun n apel ai ghesć che vëgn te nosta valada: da daidé i Ladins da tigní y mantigní la Val Badia insciö sciöche ara é. La revista »Meridiani Montagne« pón cumpré tles botëghes de foliec.  (kp)