En mercui ai 21 d'aurí domisdé s'ál abiné n bel grup de peri, che á daidé da arjigné ca les ciasesdafüch por l'urt dla scolina da San Ciascian. Ai é rová adalerch cun de vigni sort de materiai y massaries y á atira metü man cun n dër slöm. Tosc s'ál formé grups y deboriada él gnü cherié, cun tröp savëi y fantasia, cosses de morvëia. I mituns y les mitans ciarâ pro cun gran interes y amiraziun y ai ne s'aspetâ nia l'ora da podëi soghé cun les ciasesdafüch. Tlafinada él garaté de te' pici capolaurs, che i mituns y les mitans aprijëia dassënn.
Cun les ciasesdafüch t'urt unse orü ti pité ai plü pici la poscibilité da se tripé cun jüc de rode ince alaleria. Tres i jüc de rode se confrontëia i mituns y les mitans cun l'ambiënt che é incëria, cun sü compagns y impara insciö competënzes soziales, emozionales y linguistiches. Tl jüch feji do ci che ai vëiga che i gragn fej de por de. Al ti sá bel da jí ite te d'atri rodi, tres le jüch descüri le monn di gragn fajon insciö esperiënzes importantes. Alaleria pó i mituns y les mitans y lauré cun de vigni sort de materiai, sciöche ega, saurun, paltan, scorzes y plantes. Pro chisc jüc vëgn düc i sënsc stimolá y renforzá. Da juté, ciarié, mosoré, moscedé, cujiné y ciavé, impara i mituns y les mitans competënzes sciöche motrizité fina, perzeziun, coordinaziun, crativité, fantasia y competënzes de matematica y sciënza. I odun che jüc scëmpli, cosses naturales, materiai y massaries riziclades pó deventé de gran valüta por n bun svilup di mituns y dles mitans. (Les educadësses dla scolina da San Ciascian)
Ciasesdafüch t'urt
Deplü peri di mituns y dles mitans dla scolina da San Ciascian á fat sö de beles ciasesdafüch t'urt, cun chëres che i plü pici pó soghé, se tripé y imparé
Galaria retrac
View the embedded image gallery online at:
https://www.lausc.it/valedes-ladines/val-badia/15623-ciasesdafuech-t-urt#sigProIdd3d6b66bc9
https://www.lausc.it/valedes-ladines/val-badia/15623-ciasesdafuech-t-urt#sigProIdd3d6b66bc9