La Usc di Ladins

En jöbia ai 3 de jügn él sté le de internazional dla roda, metü sö dl 2018 dal'ONU. Tres l'ofizialisaziun de chësta data y de n de dediché ales rodes, á les Naziuns Unides reconesciü che la roda n'é nia ma n meso de trasport, mo ince n simbol de respet dl'ambiënt, che trasmët n messaje positif por incorajé le consum y la produziun sostenibla, cun benefizi ince sön le clima. Meton sö le de dla roda, ó l'ONU ince sensibilité i statesc mëmbri da investí sön strades y trus y d'atres infrastrotöres por rodes y ziclisć.
Te n raiun da mun, olache al é en gran pert ërc y pendënzes, él chersciü ti ultims agn le comerz de rodes eletriches. Cun chëstes röien indlunch, fajon manco fadia. Scebëgn che ares ais n certo cost, é tröpes les porsones che tol la dezijiun da spëne y da investí insciö te chësc meso de trasport. Y propi deache la domanda de rodes é tan chersciüda, n'él gnanca plü tan saurí da nen ciafé. Chi che vën y imprësta fora rodes stënta da nen comané do.

I n'ún baié cun Norbert Frenademez da La Ila, comerziant che vën y imprësta fora rodes. L'intervista podëise lí tla ediziun stampada da en vëndres ai 11 de jügn. 
 (kp)