La Usc di Ladins

Nosta storia mët man, canche n'atra storia se röia. A Badia â stlüt cun dezëmber 2019 la botëga AL.WI. Scebëgn che la stlüta ê gnüda anunziada danfora, êl romagnü te botëga n gröm de cosses y massaries por pastlené, depënje, fá de vigni sort a man... Y resté êl ince ciamó chi 70 chedri, danter chisc de chi d’autur de valüta, che ti ê gnüs condüs a Carlo dandaía (tla spana de passa 20 agn) por lascé fá na bela cornisc. Jënt i â condüt adalerch, mo s’â desmentié, o n’â nia plü odü de importanza, da jí a s’i tó. A chësta manira ési stá iló, tralasciá, zënza patrun, zënza che zacai i ess mancia. Aldedaincö é i chedri sambëgn incornijá, ciamó dal Carlo che laurâ cun paziënza y pasciun por les fotografies y i depënc. I chedri aspeta dötaurela... mo sëgn dessi ciafé n patrun nü, che dará ca val’ lassura che vá a daidé jënt che á debojëgn de aiüt.
Carolina deura porchël dodoman por n de les portes dla 'botëga y berstot' por l’aziun a fin de bëgn che dess cherdé adalerch interessades y interessá ai chedri y ai retrac. Insciö él la speranza che i chedri ciafes indó n patrun o na patrona, y por che ai pois gní tacá sö y aprijá sön n parëi de stüa o ciamena.
Le nr. de telefon de contat é eventualmënter le 339 4717751.

Iaco Rigo, La Usc di Ladins