La Usc di Ladins

Por i paurs mët sëgn man la sajun dl gran laur. Le mol denant y le tëmp cialdin dedô porta pro che al crësc tles campagnes y che i paurs mët man bel plan da sié. La pert manco bela dla medaia é chëra di tröc asos de rehl che rovará baldi ince iniann tles ciafes dles mascins. Ann por ann n’él n dër gröm che mëss patí chësta mort crödia, olache al ti vëgn sié ia öna, döes o ince plü iames. Iniann sozedarál forsc ciamó deplü, deache le fëgn é plü tardí co zënza, nes spliga le verdaciacia Hubert Tschaffert: "Chësc ann é döt tan tardí, sié fëgn toma ite sëgn amez jügn, avisa olache ares fej i pici."
Por i paurs n’él nia tan scëmpl da abiné chisc pici salverjins: tl’erba alta n’ési nia da odëi y canche ai alda la mascinn, se cüfai ia por tera impede co sciampé. Na esperiënza che ince le paur Walter Trebo dl lüch de Tor da San Martin á bele messü fá. Ël é rapresentant ladin tla Lia di Paurs de Südtirol y tëgn da sensibilisé ince sü colegs sön chësta tematica: "Vigni ann vëgnel sié ite dër tröc asos de rehl y al é val’ dër de cröde por le tier. Vigni tier á le dërt da vire süa vita y ester ne fej i rehli degun dann. Al é dër burt canche te röies pro n te’ pice tier inozënt che patësc."
La mosöra plü scëmpla por evité chësta groaria, é chëra da mëte tl pre da sié stanges cun na tascia de nylon, che tëgn spo dalunc i tiers por n pice pez. Chësc la sëra denant.

Ci sistems che al é ciamó, podëise lí t’La Usc di Ladins di 18 de jügn.  (pablo)