Badia: sopolí dala nëi

Data

21 de jugn 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N jonn de 30 agn se l’á odüda burta: en domënia él sbroché ite tla nëi sot Sas dla Crusc. An l’á ciafé a na profondité de 7 metri, curí ite dala nëi
Che na porsona toma te na sfëssa sö por i dlacias, ne n’é nia val’ de nü. Che ara toma tla nëi te nosta valada, é bele val’ che sozed plü dainré, suradöt d’isté. Rodunt chësc é indere l’intervënt che l’Aiüt Alpin á albü da fá en domënia ai 20 de jügn, sö pormez al parëi de Sas dla Crusc. N jonn dla provinzia de Verona, ann 1990, ê jü cun n compagn sö dal ander dla nëi. Al é varié sura la cutra de nëi sö cina pormez al parëi. Les eghes â indere bele lauré cotan sot tera ite y insciö éra sozedüda. Le jonn é sbroché ite tla nëi, toman jö por incër 7 metri. Al é sté so compagn che á alarmé i socursc, canche al ne l’odô y ne l’aldî nia plü. Insciö él rové söl post l’Aiüt Alpinisć Alta Badia, l’Aiüt Alpin da La Val y ince le joler dl Aiüt Alpin. "Le jonn ê arsí sön peres y ê curí da nëi", cunta Fabian Oberbacher, surastant dl Aiüt Alpinisć. Al nes á splighé che le pröm laur di socoridus é sté chël da arjigné n ancoraje tla nëi por se caré jö tla büja. Iló án fistidié da trá sö le ferí a man cina sura la nëi, olache al é spo gnü recuperé tres le joler cun la binda y lascé jö tl pre dessot. La situaziun ê valgamia critica. Dlungia les ferides al corp – danter chëstes intrames les sciables rotes – ân ince da sćiampí cun l’ipotermia, cun le corp desfridé jö cina 30 gra. Na temperatöra cuaji al limit. Le ferí á messü gní intubé sön le post, denanche gní spo joré tl ospedal da Balsan.  (pablo)