La Usc di Ladins

Al ê l’ann 1796 che i tirolesc á dé jö le joramënt al Cör de Gejú. Iniann tomâl porchël le iubileum de 225 dala impormetüda: ocajiun che i Scizeri da La Pli á tut por invié ia na aziun de sensibilisaziun y ince solidarieté. Insciö él gnü dé fora na brosciüra che vá ite plü sot tla veneraziun dl Cör de Gejú tla storia. Ala pér y sot al motto "Ladins Dëida Ladins" él ince gnü organisé na racoiüda de spënores, che jará a bëgn de families che á debojëgn. Insciö á i Scizeri chirí le contat cun le grup de laur dl proiet "Cörs dla Val Badia", a chi che an á podü ti passé la bela soma de 1.586,09€. Chisc s’injunta ales tröpes spënores che jënt a bele fat diretamënter a "Cörs dla Val Badia" y cun chëres che an á bele podü daidé cotan de families. L’aiüt vá sambëgn inant, sëgn ince tres la sbürla che i Scizeri da La Pli á podü y orü dé, deboriada cun tröc d’atri. I Scizeri rengrazia ince dötes les porsones che á daidé para.  (pablo)