La Usc di Ladins

336 é les porsones che á ciafé la variora inier, domënia ai 11 de messé, tla Ciasa dla Cultura a La Ila, olache la Aziënda Sanitara á metü da jí n »Vax day«, por ti rové plü pormez ala popolaziun y por sburlé do che la jënt vais a se lascé vaziné. I serums che é gnüs partis fora é »Moderna« y »Johnson & Johnson«, mo ma 6 porsones á chirí fora chësta variora, che pó – al momënt – ma gní soministrada a porsones sura i 60 agn. Gran é le numer di jogn che se á lascé vaziné. Dl post y ince da foradecá. Tröc é i colaboradus – che laora tles strotöres turistiches dl'Alta Badia – che nen n'á aprofité y che á insciö ciafé süa pröma dosa. Ince sce al é sté sté tl scomenciamënt val' problem, en particolar cun porsones forestes che ne s'â nia anunzié danfora y che se stentâ da scrí fora i formulars, é la coda é tosc gnüda despifada por mirit dl gran laur de infermieres y infermiers, doturies y doturs, secreters y secreteries che s'á metü a desposiziun dales 10 da doman cina les 8 da sëra por partí fora les variores. La secunda dosa gnará soministrada la domënia ai 8 d'agost, tres tla Ciasa dla Cultura, a La Ila.

Tla sënta a La Ila êl ince la direturia dl sorvisc aziendal de igiena y sanité publica (SISP) da Bornech, Livia Borsoi, a chëra che i ti ún fat na intervista che i podarëis lí tla ediziun stampada de nosc foliet, en vëndres ai 16 de messé.  (kp)