La Usc di Ladins

L’Ombolt de Mareo Felix Ploner scri: "Le svilup dles infeziuns te nosc comun tles ultimes edemes, analisé tres i dac contegnüs tles comunicaziuns dl’Aziënda Sanitara Locala, manifestëia n cheder che se damana l’atenziun de döta la comunité.
L’emoziun de liberté nes á condüt a n arbassamënt dla verda, le debojëgn normal de contac soziai a desmentié debota les ferides daurides dala pandemia y dales dificoltés vites.
L’aviamënt dla campagna dles variores á bëgn porté a smorjelé la presciun söi ospedai, mo baldi nia a archité a na mainira significativa la difusciun dl virus: al vá debojëgn da respeté les regoles fondamentales, desco le destanziamënt fisich, l’adoranza dl mascherot y l’igiena dles mans.
Ti ciaran ala inzidënza dles infeziuns edemanales de nosc comun, messunse dí che i ti jun adincuntra a situaziuns relatives ales condiziuns normatives de "raiun cöce". 
Te na democrazia pó vignun/vignöna manifesté söa minunga y so pinsier, se fá na idea, avëi na mënt critica, chirí la lerité y avëi cinamai perzeziuns n iade ia n iade ca, mo al/a mëss ince se sintí responsabla por i atri, por la comunité, por se instës. Cun respet y zënza crüzi por les lites descordantes dales söes.
L’apel é al bunsëns che vignun/öna de nos á: cun forza y speranza mo cosciënc, ajache ince i controi plü strënc, les indicaziuns scientifiches y söes interpretaziuns, les dificoltés y i sacrifizi de nos düc ne portará a nia sce i ne fajun le sforz da ponsé che ince da nüsc comportamënc depënn les vites, les economies, les prospetives y le dagní de düc i atri."

 (Iaco Rigo)