»Somonzes« á inom le cërtl cultural invié ia dal'EPL-Ert por i Ladins fora por l'isté a La Pli de Mareo. Ara se trata de na ligna de manifestaziuns che tol ite la cultura te dötes sües fassëtes, dala leteratöra, ala poesia, cina ala musiga. Indöt sarál nü mostres personales de artistes y artisć ladins, na matinée dedicada a »Les ëres de Fanis«, na rezitaziun dal epos »Fanneslied«, deplü conzerc y ince la premiaziun dl pest de poesia A. Trebo. Cun »Somonzes« se tol dant i organisadus da somené cultura y ert, a La Pli y tla Val Badia, ti scincan insciö lerch ala cultura, che é te chësc tëmp tan malsigü trö' massa gonot gnüda metüda da pert. Les somënzes podará insciö forsc porté sü früc, crësce y lascé vire inant la cultura y l'ert ladina.
I nen ún baié cun l'ideadú dl cërtl cultural y presidënt dl'EPL-Ert por i Ladins, Iaco Rigo. L'intervista podëise lí tla ediziun d'La Usc di Ladins da incö, vëndres ai 16 de messé. (kp)
»Somonzes« de cultura a La Pli de Mareo
Incö, vëndres ai 16 de messé, pëia ia le cërtl cultural »Somonzes« dales 18:00 a La Pli de Mareo, cun la daurida dles mostres d'ert personales de Margareth Forer y Mattia Maldonado. Inant se desfirará le program cultural fora por döt l'isté cun deplü apuntamënc de leteratöra, poesia, ert y musiga
Galaria retrac
View the embedded image gallery online at:
https://www.lausc.it/valedes-ladines/val-badia/16424-somonzes-de-cultura-a-la-pli-de-mareo#sigProId828266a6b9
https://www.lausc.it/valedes-ladines/val-badia/16424-somonzes-de-cultura-a-la-pli-de-mareo#sigProId828266a6b9