Chirí y ciafé aiüt tl Club

Data

17 de messel 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Les dependënzes é na plaia sota de nosta sozieté, mo tres l'aiüt de porsones espertes vára da se nen trá fora. Insciö se crüzia le Club Boé – un di clubs di alcolisć de nosta provinzia – da daidé les porsones che á problems cun l'alcol, mo ince cun droghes, föm y jüch
Le Club Boé fej pert dla assoziaziun provinziala di clubs di alcolisć teritoriai. Al é na comunité che é nasciüda por daidé porsones che á problems cun l'alcol, mo che á sëgn ince slarié fora l'aiüt a porsones che á d'atres dependënzes, sciöche cun droghes, föm, jüch y ii. La dependënza dal'alcol é n fenomen dër slarié fora te nosta provinzia. Ara se manifestëia canche na porsona vëgn confrontada cun le debojëgn da avëi chësta sostanza, canche ara bër adascusc, canche ara bër por controlé la tenjiun fisica o psichica y canche ara á bele desdrüt en pert süa personalité. N ascolist mëss fá gonot de burtes esperiënzes y arjunje le punt plü bas por capí la gravité dla situaziun y iló él gran ora da chirí aiüt te na strotöra spezialisada y spo te n club por alcolisć. Por vigni familia él ri da afronté le problem dl alcol, ciodiche ti dí a na porsona alcolisada che ara mëss lascé da bëre é sciöche ti dí a un che á l'astma da lascé da tossí. I alcolisć vëiga n nemich tla porsona che ó i daidé y se dessëna. Impormó canche ara ti vá tan mal y ai röia magari te ospedal, vëighi ite so problem y se lascia daidé. Chi che ti stá dlungia y i dëida adora ince n grup de auto aiüt, olache al é persones espertes che sá da dé consëis y aiüc. Les families ne dess mai ascogne le problem, se dodé o incolpé chël o chëra che bër. Controlé i alcolisć i fej gní nervusc. An ne dess nia ti dé alcol da bëre o tigní alcol te ciasa. An dess porvé da baié impara canche ai é sinziers, mo avëi na gran paziënza y mai i brontoré. I mituns y i jogn vëgn bele confrontá dër adora cun la saú dl alcol, ciodiche an le ciafa tl patüc da mangé, ince ti produc duci che ti plej ai plü pici. Al vëgn boiü dales festes y al ti vëgn pité vin da ciarcé. Le consum dl alcol tratan les festes á raisc sotes te nosta sozieté y fej pert de nosta cultura bele da tröc agn incá. Al é dër important da baié de chisc problems te familia, ascuté sö y tó söl scerio i mituns y sü problems, ince sce ai é ciamó pici, y jí danfora cun le bun ejëmpl. Canche i mituns röia tl'eté che ai mët man da se destaché dai geniturs, él por ëi n momënt zite y prigorus. Propi iló podessi rové tla tëra dl alcol o dla droga, sce ai n'á nia de bugn compagns o n'á nia n bun raport cun i geniturs y n'é nia bugn da dialoghé impara. L'alcol é na droga che costa püch y che an ciafa saurí. Al ti dá a chi che bër na sensaziun de euforia. An se sënt stersc y an ne se tëm plü da nia, mo i reflesc se apanëia, an á plü dî da reagí, porchël ne pón nia bëre canche an vá cun l'auto. La lege dij che por avisé n auto ne pón nia avëi plü co 0,5 gr de alcol tl sanch. Al é ri da dí tan che na porsona pó bëre por arjunje chësc limit: al depën dal'eté, dal pëis, dal ses y ince sce le magun é öt o plëgn. La dependënza dal alcol n'é nia na maratia, mo n stil de vita. Al ne joa nia da tó ite medejines, al ó indere ester la orenté da cambié vita y azeté l'aiüt da pert de esperc y dl club.  (Lidia Zingerle - Club Boé)