La Usc di Ladins

Le comité "Al Plan Events", che organisëia la Copa dl Monn de Schi a Al Plan de Mareo, á n presidënt nü. Tla sentada stada amez jügn él gnü lité al’unanimité Danny Kastlunger, 51 agn, diretur tecnich dla Sozieté di Lifc d’Al Plan y da plü agn incá general manager dla Copa dl Monn de schi. Danny surantol le tomun da so berba Willi Kastlunger, che é sté a ce dl "Al Plan Events" 18 agn alalungia y é sëgn gnü nominé presidënt onorar.
"Al Plan Events" é chël comité che á porté te Mareo manifestaziuns sportives de gran importanza: por n gröm d’agn la Copa Europa de schi, spo la copa dl monn de brëia y boardercross, zënza desmentié les tapes dl Giro d’Italia cina söinsom Plan de Corones. N travert che Willi â indere da impröma incá, ê chël da condü alerch la Copa dl Monn de schi, ci che é garaté cun la pröma gara dles ëres sön la "Erta", dl 2017.
Willi ti lascia insciö a so suzessur da arpejiun che pó se lascé odëi, sciöche ince na arpejun che Danny Kastlunger á dötes les intenziuns da porté inant. "Nosc obietif prinzipal é chël da mantigní la Copa dl Monn tl tëmp, y chël sarunse ma bogn cun tigní tres alt le livel de cualité, sides por i atlec che por le publich", dij le presidënt nü, che restará en ciaria por trëi agn. Sciöche vize dl "Al Plan Events él gnü nominé Diego Clara, che é ala pert dl comité da impröma incá y é ince responsabl dl ofize stampa.  (pablo)