La Usc di Ladins

»Dër na bela strotöra: lominosa, bela grana y da sté saurí«. Chëstes é les parores de Gigliola Thaler, coordinadëssa dles ciases di pici tla Val Badia. Ara se referësc ala Ciasa di Pici nöia a Al Plan de Mareo. La strotöra che pîta assistënza por mitans y mituns da 0 a 3 agn á daurí les portes ai 6 d’aurí y é insciö la cuarta ciasa di pici tla Val Badia, dlungia chëres de Badia, San Martin y Calfosch. La Ciasa di Pici d’Al Plan á ciafé lerch tla frabica dla scolina, che le Comun de Mareo á chisc agn fistidié da ressané, y che é ince gnüda ampliada, tres n contrat urbanistich cun la Sozieté di Lifc d’Al Plan. Tla seziun él lerch por indöt 25 pici, che á a desposiziun n gran salamënt por les ativités, n local cun ciasadafüch olache ai ciafa da marëna y n salamënt che pormët da partí sö i grups por pité ativités plü mirades, nes spliga Gigliola Thaler, che mostra gran sodesfaziun por sciöche döt é tl laur da garaté.
Le sorvisc che chësta strotöra pîta é de gran valüta, cis por chi geniturs che laora y ne n’á nia zacai che ciara do sü mituns. La ciasa di pici pîta sorvisc döt l’ann, ince fora por l’isté y te chës edemes che scores y scolines é stlütes, ma les festes nia. Ara é daverta vigni de dales 7:30 ales 14:30.

T’La Usc di Ladins di 23 de messé podëise lí deplü sön la strotöra, olache al é gran domanda, de l’ater vers n’él nia tan saurí da ciafé personal.  (pablo)