Vandalism tla Val dl’Ert

Data

22 de messel 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
"Mo te ci valada viunse pa?" Chësc le titul de na tuta de posiziun dl presidënt de SMACH Michael Moling, do che operes artistiches tla Val dl’Ert é gnüdes rovinades da ion. Al n’é nia le pröm iade. Le fat gnará dé dant ai Carabiniers
Le grup de laur dl proiet artistich SMACH é confronté cun operes che vëgn danejades, tres indô. Porsones che n’azeta nia o che l’á sö cun le proiet por na rajun o por l’atra, y se lascia fora. En chësc iade él gnü spaché pert de na opera de artisć iranians y cinamai arobé pert de na opera de n artist ucrain. Sëgn reagësc le grup cun na tuta de posiziun da pert dl presidënt Michael Moling, che mostra sö na certa frustraziun por chisc ac de vandalism. Ai scrí insciö: "Al é indô sozedü. N iade implü. Ciamó n iade. Mo olá viunse pa? Te ci valada viunse pa? Sunse pa davëi tan ospitai, generusc, daverc ai atri sciöche i scriun y retlamisun la jënt ladina indlunch? Bëgn, l’opera dl duo artistich iranian Alemeh & Shahed Mohammazadeh é gnüda vandalisada tla Val dl’Ert, le parch permanënt de SMACH che ospitëia les operes tutes sö tratan les ediziuns passades. Insciö sciöche les virgolëtes dl artist ucrain Nazar Bilyk, che é gnüdes arobades. Al n’é nia plü na chestiun da amé o nia amé l’ert, vignun é lëde da vire sciöche al arata miú, mo al é dessigü n fat de mancianza de respet devers les porsones che s’impegnëia da fá valch por la valada, da dé na sbürla nöia, da cherié oportunités nöies de chersciüda y condivijiun. I sun sura l’ignoranza fora, i sun dlungia a formes de sënn y vandalism che an ne capësc veramënter nia, che an ne iustifichëia nia. Por nos volontars, ch’i nes impegnun cun dötes nostes forzes da fá nosc miú por nos instësc y por i atri, él n afrunt nia da azeté. Y al n’é nia na chestiun de ressorses, te püc dis sistemarunse indô döt; al é plütosc n problem de inzivilté che reverda nos düc, degügn stlüt fora. Mo te ci valada viunse pa?"
Nos un tut l’ocajiun por contaté le presidënt de SMACH Michael Moling, por ti damané deplü sön i ac de vandalism, sce al á sospec y ince ci che al respogn a critiches che roda incër le proiet.

La intervista podëise lí t’La Usc di Ladins di 23 de messé  (pablo)