La Usc di Ladins

Sëgn él fat fora definitivamënter: la strada söla Munt de Antersasc danter Lungiarü y Pöz pó gní fata inant cina söla munt y les stales. Al é sté na taia lungia, n brac de fer danter i patruns dla munt, i ambientalisć, les comisciuns, l’aministraziun publica y deplü signories te sëntes dala provinzia cina ai palac plü alc de Stat a Roma.

Cun deliberaziun nr. 2022 dl 27 de dezëmber 2013 dla Junta provinziala da Balsan gnôl tut sö le recurs presenté da Johann Mair – tla cualité de patrun dla munt de Antersasc tla Val Badia, a zirca 2090 metri sura le livel dl mer – söla basa dl art. 12 dla Lege provinziala 25 de messé 1970, nr. 16, che trata la sconanza dla contrada, cuntra le provedimënt dl diretur dla repartiziun natöra, paesaje y svilup dl teritore nr. 530226 dl 2 de otober 2012, che â rofodé le proiet lauré fora y presenté dal Ispetorat verda di bosc (forestala) da Bornech. Le proiet dl Ispetorat a Bornech ê gnü lauré fora por cunt dl patrun Johann Mair por la realisaziun dla strada te munt "Antersasc II – varianta 2012", cun le deslariamënt a 2,5 m dla sëmena, por conzede l’azes ales stales cun n tractor de piceres dimensciuns por revaluté agriculturalmënter la munt y la pascentada de armënc y picia ciaussa. Cuntra la deliberaziun dla Junta provinziala â Legambiente y la Lia provinziala dla defenjiun dla natöra fat recurs, le TAR a Balsan tolô sö le recurs y architâ la lege provinziala y i laurs.

Le patrun dla munt Johann Mair é dër contënt dla dezijiun tuta a Roma, le presidënt dla Lia provinziala dla defenjiun dla natöra de Südtirol Klauspeter Dissinger á dé pro che la dezijiun finala da Roma é n stlaf al’ecologia: indó n iade á l’economia trat dant ai valurs y a na vijiun plü 'vërda' tl dagní.

Liéde do deplü tla ediziun atuala de La Usc di Ladins!  (Iaco Rigo)