La Usc di Ladins

En mercui, ai 14 de messé á le Sorvisc ai Jogn Val Badia invié a süa sentada generala, tl salf dl Istitut Ladin »Micurá de Rü« a San Martin de Tor. Sön l’ordin dl de êl danter l’ater la relaziun y l’aprovaziun dl program y bilanz 2020, sciöche ince la presen­taziun dl program de laur y le plan de finanziamënt 2021, y les lites dl consëi y di revisurs di cunc por le tëmp 2021–2024.
Bëgn 12 ê i candi­dac che s’á metü a desposiziun por rové te consëi. Set de chisc é rová ite cun le dërt de usc y trëi é gnüs cooptá lapró tla pröma sentada costituënta che é gnüda tignida en lönesc ai 19 de messé. Te chësta él ince gnü dé ia l’inciaria da presidënt y da vize. Chiló él gnü confermé Nadja Alfreider sciöche presidënta y Paul Pisching sciöche vize. Giuliana Clara é inant l’inciariada dles Cöres y á la funziun da assistënta spirituala. Al consëi ti vëgnel insciö dé pëis ala continuité y é n sëgn de stima por le laur fat cina sëgn y de crëta por le dagní.