La Usc di Ladins

Le 2019 é sté l'ultim ann olache jogn de 13 y 14 agn á ciafé le sacramënt dla Crejima. Sëgn pó jí a Confermé ma plü jogn y jones dai 16 agn insö y chësc por che al sides na dezijiun tuta cun cosciënza. Insciö pëia ia la diozeja da Balsan-Porsenú por n tru nü de preparaziun ala Crejima, n percurs tres chël che i jogn y les jones aprofondësc, adöm cun sües families, cun i toc y les totes, süa relaziun cun Gejú Crist y dá forma a na vita cristiana tla comunité.
Tla Val Badia pëion ia por chësc tru cun döes sëres de informaziun, ai 20 y ai 23 de setëmber dales 8 tl salf dles uniuns da La Val. La pröma sëra é ponsada plülere por chi dl'alta Val Badia, la jöbia é inviá chi dla bassa valada. Les serades vëgn tignides da Markus Felderer, diretur dl'ofize diozejan por la scora y le catechism, na porsona esperta y competënta, che dará ai partezipanc, jogn y jones, geniturs, families, toc y totes y catechiśc, les informaziuns prinzipales sön le tru nü de preparaziun al Confermé. Siur Degan Iaco Willeit inviëia la comunité a tó pert: »I oresson davëi che tröc toless pert a chëstes sëres de informaziun, deache ara se trata de n tru nü por düc canc, n tru che i orun jí deboriada. Sce i piun ia cun le dër vare, spo jará döt plü saurí.« La preparaziun ala Crejima döra dui agn, tëmp tratan chël che i jogn y les jones pó conësce y capí le significat plü sot dl sacramënt, imparan da aprijé y da tó sö i valurs cristians te süa vita cun cosciënza y convinziun.  (kp)