La Usc di Ladins

Do che na lege provinziala, gnüda fora dl 2017, á tut jö i consorc turistics, é les trëi assoziaziuns turistiches de Corvara, Badia y La Val gnüdes metüdes adöm y al é nasciü l'Assoziaziun Turistica Alta Badia. Por porté inant les aziuns de reclam y marketing él gnü metü sö Alta Badia Brand. Insciö án scomencé da lauré düc deboriada, cun un n ofize aministratif y un n diretur. Meton adöm les forzes éra jüda da otimisé les spëises y da redüje i cośc, jon dl medemo vers por arjunje le fin prinzipal, che é chël da ti pité n bun sorvisc ai ghesć y sambëgn ince ala jënt dl post. »Aladô dla lege pó les aziëndes turistiches avëi döes formes: ares pó lauré sot forma de assoziaziuns o de cooperativas – spliga le presidënt Oscar Alfreider – Tl momënt che i ún metü adöm les trëi assoziaziuns ne jôra nia ciamó da passé a n'atra forma giuridica, mo sëgn podunse mëte en pe la cooperativa che nes dá la poscibilité da aprofité de deplü vantaji, danterater da recuperé gran pert dl'Iva. Chësta soma che resta te nostes casses pó gní adorada por fá laurs, proiec y marketing, ince deache les Assoziaziuns/Cooperatives Turistiches – nia ma te nosta valada, mo en general te döt Südtirol – se crüzia tres deplü da surantó laurs che vá delá dal dé ma informaziuns ai ghesć. Ares se crüzia en particolar da abelí y da tigní nëc i paisc, da mëte fora ciüfs y da sié d'isté, da desparé y bate trus y pistes d'invern. L'Iva recuperada ne jará nia a smendrí la cuota soziala – che restará al momënt de 45 euro – mo pormetará da porté inant d'atri proiec«, alza fora le presidënt.

Plü controi y vantaji fiscai
»La cooperativa ti dá na maiú segurëza a düc i assoziá. Les cooperatives vëgn controlades vigni dui agn dër avisa dal Ofize por Cooperatives dla provinzia. Implü á la cooperativa, scioche dötes les sozietés, regoles de funzionamënt plü tleres y trasparëntes«, spliga le diretur Max Nagler. Le passaje da assoziaziun a cooperativa podess garaté anter forá dl 2022. A mez novëmber gnarál tigní – online - na assemblea ordinara y öna straodinara, te chëra che al gnará traté la mudaziun dla forma iuridica, dij inant le diretur. Por podëi trasformé l'ATAB te na cooperativa ole ester le consëns de trëi cherc di assoziá, che é 760.

Na delega menada fora por e-mail
»La pandemia ne pormët nia da tigní na sentada cun la presënza de düc i assoziá, porchël menunse fora por e-mail a düc i sozi na delega. Vignun pó spo deleghé un di trëi presidënc – Oscar Alfreider, Augusto Manco o Felix Dapoz (nominá dal consëi diretif desco “rapresentanc”) – y messará scrí fora sce al é a öna da deslié la assoziaziun por mëte en pe na cooperativa. Le capital sozial vëgn partí sö te cuotes soziales dl valur de 45 euro y le Consëi de Aministraziun resta en forza cina d'aisciöda dl 2023, canche al sará les lites nöies. Sce al vëgn arjunt le cuorum de 75% de assoziá che é a öna, gnará la mudaziun menada inant te Provinzia; al sará 60 dis de tëmp olache al podará gní fat recurs. Spo podará la Cooperativa Turistica Alta Badia gní scrita ite tla Ciamena dl Comerz, bunamënter anter forá dl 2022«, stlüj jö Nagler. La delega mëss gní scrita fora, firmada y menada inant por e-mail o PEC a la adressa che gnará comunicada. »Chi che ess problems o dificoltés pó zënz'ater storje pro te un di ofizi turistics«, dij le presidënt Alfreider che fej n apel ai assoziá: »I sperun che düc i sozi se toles a cör chësta mudaziun, deache al foss dër sciode sce ara ne garatass nia por püces usc. De fora cambiel püch, por le laur intern él de gran vantaji che vá a bëgn de döt le teritore y di assoziá.«  (kp)