La Usc di Ladins

Por i corps de stödafüch él important da avëi tres indô atrezadöres y mesi al vare cun i tëmps, por ti ester manëcia ai intervënc desvalis por chi che ai vëgn cherdá. Nia atramënter n’éra pro i Stödafüs d’Al Plan, che â bele de setëmber dl ann passé ciafé te magazinn n meso nü por i intervënc, mo danter lockdowns y limitaziuns án tigní la benedisciun impormó iniann, plü avisa la sabeda ai 23 d’otober.

Sön plaza dan magazinn á le comandant Daniel Lanthaler podü saludé le curat siur Heinrich Perathoner, l’Ombolt de Mareo Felix Ploner, le presidënt dl raiun di stödafüch bassa Val de Puster Reinhard Kammerer y l’ispetur de raiun Elmar Irsara, sciöche ince l’ispetur dla bassa Val Badia Alexander Zingerle, le corp di stödafüch d’Al Plan, mëmbri fora de sorvisc, les totes di auti y sambëgn ince la tota dl auto nü – Petra Erlacher Mutschlechner.
Danfora á le comandant splighé che l’auto nü tol ite le post de dui mesi plü vedli: na Campagnola y na Land Rover che á fat sorvisc respetivamënter por 46 y 35 agn. Auti che n’ê nia plü al vare cun i tëmps y se damanâ ince manutenziuns tres plü granes. Insciö án tut la dezijiun da cumpré n auto nü y por studié cal che al dô ester, s’án metü adöm cun i Stödafüch da San Martin, por ciafé n meso che foss adaté por les esigënzes d’aldedaincö. L’auto ne dê nia ma sorví cuntra le medefüch, mo ince por d’atri intervënc che vëgn a s’l dé plü gonot – cis por le rî tëmp.

T’La Usc di 5 de novëmber podëise lí deplü sön l’inaudaziun y benedisciun, che che é i stödafüch nüs che á dé joramënt, cai che á podü pié do na onoranza y cun ci noela che an á stlüt jö le de.  (pablo)