"La situaziun é critica y les previjiuns é scöres". Cun chësta picia frasa pón descrí sinteticamënter la situaziun che le paisc d’Al Plan á cun l’ega da bëre, sce an ascuta i responsabli dl Consorz dal’Ega. I comuns á la responsabilité da fistidié por l’ega da bëre ti paisc; dl ann 2013 á le Comun de Mareo surantut l’ega sön teritore comunal, tl paisc d’Al Plan ál fat na convenziun cun chëra che al ti á lascé inant le manajamënt al Consorz dal’Ega da Bëre d’Al Plan, che fistidiëia da vedlamënter incá. Le Consorz sorvësc porchël inant les utënzes, fistidiëia da mëte jö les condütes y dla manutenziun; le Comun resta inant patrun y responsabl dles conzesciuns y dl sorvisc. Chësc manacia sëgn da gní
strënt, deache les fontanes atuales ne tleca nia plü y al ó ester le plü snel che ara vá fontanes nöies. Le paisc vëgn maiú, al vëgn tres lapró strotöres d’albergaziun nöies y insciö tres plü jënt da "socodí"... y le consum crësc ann por ann. Le problem cun l’ega da bëre ne n’án cina ciamó nia tratan l’isté, olache al n’é ciamó assá, mo suradöt d’invern ti tëmps da Nadé y Carlascé, canche la portada dles fontanes é cotan mëndra y le paisc é indere toch y plëgn de jënt. Danter les soluziuns pënson ales Fontanes da Lé dla Crëda – che sorviss ince sciöche alternativa sce öna na condüta toma fora. Ares é indere sot a sconanza naturala. Comun y Consorz laora por arjunje na conzesciun.
T’La Usc di Ladins di 12 de novëmber podëise lí deplü sön la situaziun cun l’ega da bëre, i consums, les soluziuns. Lapró podëise ince lí co che l’Ombolt Felix Ploner valutëia la situaziun y co che le Comun s’armöi. (pablo)