La Usc di Ladins

Le bel travert arjunt da Dolomiti Superski cun la presentaziun dl sistem inovatif de control dl green pass sön lifc y pistes, che á ciafé arat positif da pert dl garant dla privacy, á tosc messü tocé cuntra i dac relatifs ales infeziuns da Covid-19, che crësc ultimamënter dër dassënn tla Provinzia da Balsan. Insciö á l'Assoziaziun Turistica Alta Badia mené fora en lönesc sëra na e-mail a düc i assoziá, fajon tremoré ostis y operadus turistics: la daurida dla sajun da d'invern, preodüda por i 4 de dezëmber, manacia da messëi gní sburlada. Nosc raiun podess tosc gní classifiché »ghel« o cinamai »arance«. Insciö scri le diretur dl'ATAB, Max Nagler, tla mail, menada fora ince a inom de ABB y CIFAB: »I dac dles atres regiuns, che n'á al momënt nia te na situaziun de emergënza, desmostra l'utilité dla variora sciöche le su strumënt por contrasté la pandemia. (…) L'assessur ala sanité dla Provinzia da Balsan á lascé al savëi che plü co le 90% dles porsones che é te ospedal por Covid, n'á nia fat la variora. Por evité che al vëgnes a se l dé la situaziun paradossala che nosta provinzia ne pois nia pié ia cun la sajun da d'invern, mo i raiuns dlungia sciöche Reba, Fascia y Ampëz bëgn, fajunse n apel ai assoziá y residënc da sensibilisé düc chi che n'á cina incö nia ciamó fat la variora, da se lascé vaziné.«  (kp)