Cunté dl tëmp passé por odëi che ch’i sun

Data

19 de november 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Al é gnü fora le "Calënder Ladin" nü, por l’ann 2022, al é le numer 61 tla storia dla "pratica ladina". Ince te chësta ediziun él cënc de retrac vedli y ince testemonianzes dl tëmp passé. Lapró él leteratöra y ince ert
L’uniun culturala y artistica EPL–Ert por i Ladins á dé fora dan otedé le "Calënder Ladin 2022", n liber de 336 plates, metü adöm aladô dla tradiziun dai dis y sanc ia por l’ann nü, da stories y cunties, da retrac vedli y da testemonianzes di tëmps passá. Le cuertl y i mëisc vëgn acompagná da retrac dl fotograf da La Val Alfred Erardi che vir a Ehrenburg.
Ti ciaran al indesc ciafunse te chësc numer n gröm de cunties, stories, poesies (chëres premiades a selezionades al Pest Angelo Trebo 2021), zitac, matades, mo ince biografies cörtes y testemonianzes di tëmps pasa: insciö sön Otto Rubatscher, Micurá de Rü, i fredesc Chizzali d’Antermëia, Alfonso Ties d’Al Plan de Mareo y Arcangel Pitscheider da Rainé.
La novité é ince i cater contribuc scientifics de Lois Craffonara, trëi de chisc trata cuestiuns de etimologia (la proveniënza de parores y inoms tl ladin). Ince la vila da Jusciara vëgn presentada, sciöche la cronica de plü diejënns dl paisc de Badia.

Auturies y auturs de chësta ediziun
Tl "Calënder Ladin 2022" él da ciafé contribuc scric da chëstes auturies y auturs: Lydia Zingerle, Lois Trebo, André Comploi, Iaco Rigo, Silvia Liotto, Pablo Palfrader, Lois Craffonara, Roland Verra, Giuvani Pescollderungg, Antonietta Crepaz, Carlo Suani, Cristine Call, Katia Pizzinini y Pio Sottara.
Na bela schira de firmes, sozietés, profescionisć y porsones á ince por chësta ediziun inserí n so reclam a paiamënt por daidé paié les spëises de realisaziun, formataziun y stampa dl Calënder Ladin. L’uniun EPL–Ert por i Ladins é reconescënta de chësc aiüt, odü che al ne vëgn pié do degun contribut publich (dles cutes) por la publicaziun.
Le Calënder Ladin 2022 é gnü fora cun na tiratöra de 1.300 toc y vëgn venü da ciasa a ciasa al prisc de 14,00 euro. Da ciafé él ince tles botëghes Mascotte y Market da Richard a Longega, sciöche ince tla redaziun de La Usc di Ladins a La Ila (l’ofize é davert dal lönesc al mertesc dales 8:00 ales 12:00 y dales 14:00 ales 17:00, y le mercui dales 8:00 ales 12:00) y a San Martin de Tor (l’ofize é davert dal lönesc ala jöbia dales 8:00 ales 12:00 y dales 14:00 ales 17:00, y le vëndres dales 8:00 ales 12:00).

Liéde do deplü tla ediziun nöia de La Usc di Ladins!