La Usc di Ladins

Ai 12 de merz 2021 é pié ia tla Val Badia le proiet Cörs dla Val Badia, metü en pe da n grup de laur cun rapresentanc dal monn economich, sozial y religius dla Valada. Le fin dl proiet: tigní adöm y se dé na man tl tëmp nia saurí dla pandemia. Un di pilastri dl proiet ê la racoiüda de alimentars, por chëra che al é gnü metü te cotan de botëghes dla valada scafes cun le logo, sön chëres che n gröm de jënt á metü alimentars da i dé inant a families tl debojëgn. Chëstes ciafâ poc de spëisa diretamënter a ciasa, o podô gní a se tó mangiaria tles bancareles dl mangé. Do che an á albü na buniscima sajun da d’isté y che al gnô ma plü pücia jënt ales bancareles, án tut la dezijiun da les lascé palsé por intant. Le proiet ne n’ó nia "sforzé sö l’aiüt", mo le pité canche al vëgn concretamënter damané. Les bancareles é porchël arjignades da tó sö indô l’ativité, sce al foss le debojëgn.

N secundo pilaster important é sté chël di aiüc finanziars, olache al é gnü surantut n gröm de cunc por spëises primares de porsones y families: patüc de scora, sanité, spëises dla ciasa y i.i. Y chësc cun spënores che é gnüdes ite. Al é da rengrazié suradöt la jënt dla Val Badia, che á fat spënores por la bela soma de 30.049,09€ – na soma che á mostré na gran mania leria y confermé la convinziun di iniziadus che la jënt dla Val Badia á n cör davert da daidé canche ara ó ester.

Tan de scioldi che al é gnü dé fora y co che ai é partis sö, podëise lí t’La Usc di Ladins di 19 de novëmber  (pablo)