La Usc di Ladins

"Quelli che..." sön Rai2, "Piazza Pulita" y "Di Martedí" sön LA7. Döt trasmisciuns televisives che s’á dé jö cun Südtirol, plü avisa cun le numer alt de no–vax te nosta provinzia, y cun les "corona-partys" che á oramai ince despassé i confins talians. Chës festes olache jënt se taca le virus da ion por ne messëi nia fá le green–pass. Chëstes trasmisciuns á albü na faziun püch positiva sön Südtirol, che s’á dagnora presenté sciöche le "pröm dla classa" y vëgn sëgn tan deplü coiené fora de mosöra. Chiló á bonamënter ince albü val’ da dí la chestiun etnica y la orenté da ti la cacé n iade ai "crucchi", sciöche i todësc vëgn tlamá cun desprisc. Por le comportamënt de püc él tröc che la paia y sint les conseguënzes, cun n dann ince de imaja che ne se lascia nia saurí calcolé y preodëi. Un che á sintí les conseguënzes y les ostilités é Michael Call, ostí jonn dl Almhof Call d’Al Plan, hotel dla categoria alta. N post sön Facebook por incundé la sajun á provoché frustraziun y cativeria,cun aodanzes da jí alania, da ne daurí mai plü y l’impormetüda da jí tl Trentin, mo nia plü te Südtirol. Dedô él ciamó gnü les desdites.

T’La Usc di 3 de dezëmber podëise lí la intervista a Michael Call  (Intervista: Pablo Palfrader)