La Usc di Ladins

L’idea da mëte sö na baraca dal vin cöt tl paisc da Lungiarü â le grup di Jogn bele plü da di. Dl 2018 éra stada tan inant. Na bela baraca infornida sö cun dascia y löms ê gnüda metüda sö tl zënter y dui iadi al’edema gnôl daurí y dé fora de vigni sort de boandes cialdes y valch da sgolosé. Chësc proiet é gnü tut sö dër bun dala jënt dl paisc, ai podô lascé l’auto a ciasa y jí a se bëre n gote de vin cöt en compagnia, implü implî la Stüa da Nadé le zënter dl paisc cun vita y na bela atmosfera tl tëmp d’Advënt. Nia ma i jogn stô ion pro la baraca, mo ince families y mituns storjô ion pro. Insciö á le grup di Jogn tut la dezijiun da mëte sö la Stüa da Nadé vigni ann, cun tres val’ novité y val’ toch lapró. Cinamai dl 2020, canche la situaziun ne á nia pormetü da daurí la baraca, á i Jogn ponsé da porté inant la tradiziun y á impó metü sö y inforní la baraca, por ti scinché ala jënt te chël momënt nia saurí n pü’ de normalité tratan le tëmp da Nadé. En chësc isté, cun la gran speranza da podëi indô tigní davert, á le consëi di Jogn tut la dezijiun da daurí na Stüa da Nadé nöia y n valgügn mëmbri dl grup s’á tut sö la inciaria da realisé na baraca. Ores de tëmp lëde á chisc jogn dediché al proiet, che á porté tlafinada a n beliscimo resultat. I Jogn da Lungiarü tol la ocajiun por rengrazié i dui consëis di Jogn che á metü en pe la Stüa da Nadé, chi che á daidé da fá sö la baraca, l’aministraziun de Comun, düc chi che á de val’ vers dé na man y sambëgn ince chi che storj pro a nes ciafé. La Stüa da Nadé é daverta cina ai 7 de jená, mertesc y vëndres dales 20.00 inant.   (Armin Moling por i Jogn da Lungiarü)