La Usc di Ladins

Do les döes gares söla "Olimpia dles Tofanes" en sabeda y domëgna, gnará les protagonistes dla Copa dal Monn de schio alpinn FIS a Al Plan por le slalom lerch söla pista Erta.
Da ensëra encá sán che la gara marora gnará motüda da jí con jont co ciara pro (spetadus): 2.000 danter enviês, sponsors, colaboradus y tecnics. Al ne sará nia la poscibilité söle post de consumaziun de spëisa y boanda, y gnanca la fortüna da cumpré na cherta de entrada (tickets) , deache cöstes é belo dötes dades ia.
La jont co jará coi schii en cösc de sön Plan de Corones, y plü avisa danter Picolin y Al Plan, podará s’archirté pormez ales sis y rëis dla Erta dales perts sö por ciaré desche les campionësses stiza jö danter les portes, schivenn sambën amüdlamonc y d’atri prighi de contat pandemich.  (Iaco Rigo)