La Usc di Ladins

Le »speed dating for job« é n sistem dër particolar de archirida de laur. Ara se trata de na na ligna de incun­tades dër cörtes danter rapre­sen­­tanc dles dites y porsones che chir laur, che se desfira öna indô l’atra te n medemo ambiënt. Chësta sort de metoda vëgn dal’America ca y á tres na maiú difujiun y plü suzes ince chiló da nos. Le dialogh döra püc menüc y te chësc cört tëmp mëss le canditat o la candidata ester bugn da descedé l’interes dl datur de laur. Le sonn de na bronsina é le signal che i candidac mëss baraté postaziun y jí inant cun n’atra incuntada. Tra­mes les perts se presentëia, cunta de sü interesc y á la poscibilité da fá val’ domanda. L’Uniun Artejanat Val Badia á organisé n »job speed date« por les studëntes y i studënc dles Scores Altes da La Ila. La mani­fe­sta­ziun é gnüda a se l dé ti locai dla sënta nöia dla dita Graus a Zija/Badia ai 31 de merz 2022. Por l’ocajiun él rové adalerch 11 dites: Graus, Mamp, Isifer, Gaidra, Decor, m2 railgroup, Holzmar, tislaria Bernardi, Plana Ladina, Auto Alta Badia, PF Design, che á podü incunté 22 jogn y jones dles classes 4. y 5. ITE. L’evënt á descedé gran interes da pert dles studëntes y di studënc deache ai á albü l’ocajiun da conësce plü da dlungia un di pilastri dla economia de nosta valada. Deplü studëntes y studënc s’á fat de morvöia, sön tan de poscibilités interes­santes de laur che le monn dl artejanat pita. Vign dita ti á splighé les carateristiches de süa ativité sotrissan ci che ares s’aspeta dai colaboradus. Les Scores Altes da La Ila rengraziëia Artejanat Val Badia por la buna colaboraziun y l’organi­saziun dl evënt.  (Scores Altes La Ila)