Les localités turistiches é tres danü ala chirida de idees nöies por manifestaziuns y evënc da ti pité al ghest. Poscibilmënter evënc che sides autentics, che trasmëtes le spirit dla localité y che ciares ince ala sostenibilité ambientala. Insciö ince la Cooperativa Turistica Al Plan/San Martin, tan deplü deache an á dal ann passé incá ince la merscia turistica GSTC por n turism sostenibl. Partners dla CT é de chësc vers bele plü gonot les universités, spliga le diretur Carlo Runggaldier: »I laurun bele da 4 agn incá cun les universités, sides chëra de Balsan co de Trënt. Al nes vëgn plü gonot propostes da tó pert a proiec, forsc ince deache i sun na destinaziun interessanta da plü punc d’odüda: te Mareo unse
n raiun dër svilupé, a San Martin manco, spo él l’aspet dla cultura, dla sostenibilité, i sun tles Dolomites y porchël ince azicá dales tematiches incër le overtourism«. Na colaboraziun universitara é gnüda a s’al dé ince ti ultims mëisc, plü avisa cun la Laurea magistrala de Management dla Sostenibilité y dl Turism (MaST) pro le Departimënt de Economia y Management dla Université de Trënt. Te n proiet de semester s’á incër 40 studëntes y studënc dé jö cun propostes de iniziatives che an podess ti pité al scior. Deboriada cun la CT án definí cater tematiches che i studënc dê tigní cunt: la valorisaziun dles ressorses naturales, dl’agricoltöra y zidlamënt de tiers, dla fauna salvaria y dla educaziun ambientala. Le resultat de chësc proiet é 8 idees de produc turistics, che i studënc á presenté te Ciasa dl Parch d’Al Plan.
Ciünes che al é y de ci vers che ares vá, podëise lí plü avisa t’La Usc di Ladins di 29 d’aurí. (pablo)
