La Usc di Ladins

La uniun di stödafüch da La Ila cumpëda 92 mëmbri, de chisc él 64 mëmbri atifs, 14 fora de sorvisc, un n mëmber de onur y 14 fej pert dl grup jonil. Por le paisc da La Ila é chësc n gran numer de volontars che se mët a desposiziun por daidé i atri. Tratan le 2021 ési gnüs cherdá indöt 20 iadi. Cin' iadi por via de mesdefüch, trëi te paisc y dui fora de paisc, y 13 iadi por intervënc tecnics, sciöche inzidënc sön strada, aziuns de archirida y ii. Aldedaincö ne sona nia plü la sirena pro vigni intervënt. I stödafüch vëgn alarmá tres le pipser y na aplicaziun che ai á sön le fonin.

Benedisciun dl auto nü
I stödafüch é rová te dlijia en defilada, acompagná dala musiga. Pater Franz á zelebré na bela funziun, alzan fora l'importanza por le paisc da avëi n grup de volontars che vëgn tres plü y plü cherdá nia ma por via de mesdefüch, mo ince canche al vëgn a se l de danns gaujá dal ri tëmp. La comunité, che é por dui agn alalaungia gnüda despartida dala pandemia, á indô podü rové adöm y se strënje incër i stödafüch y zelebré la festa dedicada a so sant patrun. Do la santa mëssa s'á la comunité abiné dan le magazinn, olache al é gnü metü fora l'auto nü. Ara se trata de n »KLF-Iveco Daily 4x4« che pó condüje nü porsones. Al á na pumpa, de vigni sort de slauhs, atrezadöra da adoré tl caje de inondaziuns, n agretat dal strom y na lominara che fej na gran löm por lauré incër l'auto ia. L'auto nü barata fora le »Daily« che ê gnü cumpré dl 1992 y che é sëgn gnü venü inant. Le comandant di stödafüch da La Ila, Armin Bernardi, á rengrazié le consëi di stödafüch che s'á dé jö por cumpré le meso, la Uniun di Stödafüch dl Südtirol, le Comun de Badia, la Fraziun da La Ila y sambëgn ince la tota Emmi Frenademez. Do la benedisciun á la Musiga soné ciamó n valgügn toc sön plaza, olache an á podü ti ciaré plü dampró al auto nü y i pici á albü la poscibilité da fá na roda cun la litra di stödafüch.  (kp)