La Usc di Ladins

I orars de scora n'é nia i medemi te dötes les scores elementares dla Val Badia. Insciö vá i mituns y les mitans tla direziun d'Al Plan vigni de a scora cina les döes domisdé y ciafa la refeziun. Tles elementares dl'alta Val Badia é indere i orars desfarënc: chiló vá i mituns trëi iadi al'edema a scora cina les 12:50 y dui iadi stai a scora ince domisdé, cina les 15:35, ciafan da marëna. Deplü é i geniturs che á damané la direziun sce ara foss jüda da mudé i orars, cossa nia tan saurida deache lapró tochel deplü sorvisc che reverda sides la refeziun co i trasporc. Por capí plü avisa tan tröc che foss stá aüna da mudé i orars á la direziun dles scores de Badia invié ia n sondaje tles scores elementares da Corvara, La Ila, San Ciascian, Badia y La Val. Al é gnü damané fora sides i geniturs co i scolars y les scolares. I mituns y les mitans á respognü ala inrescida te scora; i geniturs á ciafé le sondaje da respogne a ciasa. I resultac é sëgn dan man y ai é gnüs presentá te vigni seziun tratan i consëis interclassa. Sciöche al ê gnü fat fora, por mudé i orars, ess chësta ghiranza messü gní manifestada da na maioranza ampla y chësta é ma gnü arjunta te öna na scora dla direziun: tla scora elementara da La Val se á za. le 70% damané na mudaziun di orars, deperpo che ti atri paisc á la gran pert desmostré la orenté da mantigní i orars sciöche ai é. Insciö, nes spliga la direturia Claudia Canins, gnarál adoté tratan le proscim ann de scora – 2022-23 – n orar sperimental tla scora elementara da La Val y adaté i sorvisc che toca lapró.  (kp)