La Usc di Ladins

Zacô él düc che i aspeta amez ma. I baiun di sanc dl frëit che vëgn dai 11 ai 15 de ma. "Ai é pa dagnora gnüs", áldon tl baié y de regola portai frëit, brojes tratan la nöt y ciamó val’ sblancoiada sö por chi crëp. Iniann fejai na ezeziun – öna dles tantes che le tëmp fej tres plü gonot. I sanc dl frëit á porté dis valgamia cialc, cun temperatöres bëgn sura i 20 gra fora. La piza é stada ai 15 de ma cun Santa Sofia, che á porté ales basses temperatöres cinamai daimpró dai 30. La morvëia ne n’é nia ma le cialt, mo ince i temporai che an á albü gonot. Toné ál tla valada ai 13, ai 15 y ince chësc lönesc ai 16. A Al Plan él gnü la domënia domisdé fora de n sarëgn bindebó de temporal, che á condüt ince granijores tan da fá gní i urc n pü’ blanc. Granijé ál ince sö cuntra les munts, olache le Rü de Fojedöra á slavaté jö i pröms paltans. Nia de prigorus, mo impó val’ de nia usual da chësta sajun.
Pité á chësta domënia ince n bel spetacul: l’anterbanch tratan la plöia groia, cun les gotes che slominâ sciöche de te pici diamanc tl sorëdl.  (pablo)