La Usc di Ladins

Gonot vára dër snela: na porsona che ê ciamó sana y autonoma, á tres plü debojëgn de aiüt y sostëgn. Ci che ê tl pröm n sostëgn tla vita da vignidé, devënta de gre en gre propi cura y assistënza. Te chëstes situaziun él important da savëi olá che an ciafa informaziuns y l’acompagnamënt adaté. La Comunité Comprensoriala Val de Puster é cun sües portines de assistënza y cura le pröm punt de contat por les porsones atocades da chëstes situaziuns. Le personal dá informaziuns, pîta n suport y dëida scrí fora les domandes desvalies. Por avëi na maiú suravijiun sön i sorvisc, á l’Aziënda Sanitara a Bornech y la Comunité Comprensoriala Val de Puster publiché n codejel, na guida por familiars che fistidiëia dl’assistënza. Laite ciafon dötes les informaziuns d’öga, pian ia dal s’arjigné ca por l’assistënza a ciasa cina ales ofertes y sorvisc de suport, por rové a conscidraziuns y aprofondimënc sön argomënc che taca lapró. Le codejel ciafon pro les portines dl’assistënza y cura ti raiuns sozio-sanitars. Les portines organisëia ince manifestaziuns y cursc sön le tëma dl’assistënza. Öna de chëstes é gnüdes a s’al dé en chësc de a Dietenheim, sot al titul "Costruí punc cun les porsones atocades da demënza". Pro i referënc êl ince le primar de neurologia Gregorio Rungger d’Al Plan. Tut pert a incër 100 porsones. Informaziuns ciafon ince tla portina por assistënza y cura tl raiun sozio–sanitar Val Badia.