La Usc di Ladins

Te chësc mëis de ma án da fá cun n tëmp valgamia demorvëia: cotan cialt, da tröc temporai, graniades y vënt. T’Al Plan él ti ultims dis dui iadi tomé granijores, por fortüna zënza fá de majeri danns. Atramënter éra stada tla nöt dai 20 ai 21 de ma. Do na bela sëra cialdina cun feter gnanca na niora sö al cil, s’ára mudé püch dan la mesanöt. Iló él gnü n gran temporal cun plöia y vënt, che s’á tlafinada ince damané l’intervënt si stödafüch. Danter i corps che á messü fora toca ince chi da San Martin y Al Plan, cherdá dales 23:29. Al ê da jí sön la strada dla Val Badia danter Longega y Picolin, olache al é tomé valgügn de gragn lëgns te strada. Tl intervënt éra jüda da desgorje i gragn lëgns y romené la strada por l’avëi indô lëdia por le trafich. A gauja de lëgns te strada é ince gnüs cherdá i Stüdafüch da La Val, alarmá dales 23:50. (pablo)

Fotos intervënt: ©Stödafüch San Martin
Foto temporal: © Kristin Moling