La Usc di Ladins

Dai 25 de jugn ai 3 de messel 2022 ne saral tla Ciarencia, olache al viv adum da secui todesc y slovens, nia demé partides sportives, ma ence na ciadeina de encontedes y manifestazions politiches y culturales sciche acompagnament dl gran turnier europeich. Sot al moto "together unique – gemeinsam einzigartig – skupaj enkratni" (adum unics) se endunarà entourn a 1000 partezipanc:tes da duta Europa, y vivarà y mostrarà la diversité y l plusvalour dles nazionalités desferentes, de cultures vies y lingac spesc. I juesc al palon de ei y eles vegnirà portés fora te dodesc luesc te duta la Ciarencia sciche ence soura l confin via, tla Slovenia. 

Loránt Vincze, l president dla FUEN, organisazion che met a jì vigni cater agn la Europeada à dit tla conferenza stampa dant otedì: "La Europeada é la essenza de nosta miscion – nos mostron l miour de cie che la diversité culturala europeica à da mostré su. Al é na show straordinara y unica, che à n gran carater europeich." La manifestazion met tl medem temp ence n azent contra la intoleranza y la descriminazion dles mendranzes de vigni vers. La idea dla Europeada é nasciuda dant na deseina de agn per ti dé notizia a les mendranzes y na sia union sot la FUEN.

Da portaousc dla union Europeada y dirigent dl comité de organisazion à Marko Loibnegger lascé cialé viadò les cuintes dl gran event sportif y sozial. "Passa 100 persones laora demé per desfiré l turnier dl palon, endut é entourn a 250 volontars:es atifs:es per arichì la gran manifestazion con talks politics, conzerc y prejentazions culturales.

Les partides ne sarà nience en chesta outa nia demé divertiment, de plu scuadres (con I Ladins laprò) à de bones chertes da fé partides a livel internazional. I jugadours à na esperienza y cariera de categoria regionala. Chest à ence dit l tecnich Marijan Velik, president dla lia dl palon dla Slovenia y caposcuadra dla formazion di Slovens dla Ciarencia, la mendranza che ospiteia chesta edizion dla Europeada dai 25 de jugn ai 3 de messel 2022.

La Europeada vegn daurida ofizialmenter endoman, sabeda, da les 16:00 a Sankt Kanzian am Klopeiner See (distret de Völkermarkt/Velikovec) – chi 30 km da Klagenfurt am Wörthersee.