La Usc di Ladins

Dit damperfora, te chësc momënt che i scriun (5 d’agost dales 19:30 za.) é tröc stödafüch ciamó sön tru por la lista lungia de intervënc che á metü man defata do les 17:00. Püch denant âl metü man da plovëi sciöche le cil foss davert cun plü granüjades danterite y te chës döes ores él gnü danter 70 mm de plöia a Al Plan cina chi 90 mm tl raiun da San Martin de Tor. I Stödafüs d’Al Plan á cina sëgn 11 intervënc, danter material slavaté te strada, ega che é rovada te cianoes y ince te strotöres turistiches. Da Pedagá sö é material rové pormez a na ciasa, de gran eghes él gnü jö sura Valiares. Da Mantëna jö cuntra Longega él les eghes slunfades cun material te strada. Püch do les 19:30 á l’Ombolt de Mareo Felix Ploner lascé alsavëi che les strades da Rara, Frena, Rara y Sarjëi é stlütes por roes.

Chi da San Martin é ince gnüs cherdá 6 iadi, chi da Lungiarü y Antermëia un n iade - iló él danter l’ater gnü stlüt la strada da Mirí, la strada danter San Martin y Lungiarü, la strada da San Martin cina ite dala cava. Olachessî él gnü jö material y jü porsura rüs, nes dij l’Ombolt Giorgio Costabiei, che i un arjunt dër en cört al telefon. Ince chiló éson ciamó al laur. Na strotöra turistica da San Martin é gnüda evacuada por segurëza.
Chi da La Pli é gnüs cherdá por 4 intervënc y á messü jí danter l’ater sö cuntra Furcia. Ince chi da Rina é gnüs cherdá por n intervënt.
Dales 19:15 él intratan gnü n pröm intervënt ince por i Stödafüch da Calfosch, ince chiló por material gnü jö.

Families rovades tl tëmp
Intervënc á ince albü l’Aiüt Alpin Mareo, che é jü cun la jeep sö cuntra Fojedöra a do na familia rovada tl tëmp. Ai l’á ciariada t’auto y da gní jö zoruch n’ái ciarié sö na secunda. Indere ne rovâi tlafinada nia plü inant, ajache les plöies s’â tut la strada. Insciö án messü cherdé le joler dl Aiüt Alpin che á condüt al sigü anter plü jori families y socoridus.


Sciöche dit: la situaziun é provisora. Atualmënter tonel ciamó, la plöia á intratan lascé do.  (pablo)