Pacho: la muntagnola dla munt de Valparora

Data

09 de agost 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L'ann passé d'aisciöda â la familia Oberhofer, che manajëia la munt de Valparora, ciafé na picia muntagnola sön n pre. Ai l'á trata sö y ti á dé inom Pacho; al é gnü scialdi zerte y vir sëgn impara sön la munt 
L'ann passé de jügn á la familia Oberhofer, che manajëia la munt de Valparora da n gröm d'agn incá, ciafé na picia muntagnola sön n pre. Le tier ê gnü sciuré fora de tana dala uma, canche al ê ciamó pice daldöt; al ne daurî gnanca i edli. Ince sce ai se menâ picé dla picia muntagnola, l'âi dampröma lasciada iló, cun la speranza che la uma gniss a s'la tó. Do da n valgönes ores êra indere ciamó sön chël pre y al manaciâ le tëmp. Ai se l'â porchël tuta para te ciasa y â metü man da la ojoré, ti don ite lat cun na spriza. Tratan döt l'isté é la picia muntagnola, che é gnüda batiada cun l'inom de Pacho, stada pro la familia Oberhofer, che se l'á spo, ala fin dl'isté – canche ai á saré la malga - tuta para a Pfunders, olache ai vir.

Ai s'á informé pro n espert, por savëi plü avisa ci fá cun le tier, che á podü fá la palsa da d'invern te so garage, n post bun cialt: »Na muntagnola vir cun süa familia cina al'eté de dui agn. Cina iló ne éra nia autonoma, ara ne sá nia da se ciavé na tana, sot tera da sora essera massa frëit, ara ne ess nia da mangé y bunamënter morissera. Porchël unse tut la dezijiun da se tó para Pacho ala fin dl isté y da ti lascé fá la palsa da d'invern te nosc garage«, nes spliga Lena Oberhofer, che dij spo inant: »Al é dër important che les muntagnoles dormes fora por l'invern, deache scenó vëgneres agressives. Pacho dormî feter döt le de, al lovâ ma un n iade al de a mangé.«

D'aisciöda é spo la familia Oberhofer indô gnüda a sté sön la munt de Valparora y s'á tut para Pacho, che é intratan gnü dër zerte. Al s'la roda fora por i pra, se chir instës da mangé, erbes, raisc y somënzes. Ël ti vá adincuntra ales porsones y n valgügn iadi al de val te ciasa a ciafé süa familia, chëra che l'á trat sö.
Pacho é deventé zacó na atraziun dla munt de Valparora y tröpa jënt storj pro a ti ciaré, a fá na foto impara. Mo impó desson avëi respet por chësc tier, che é por natöra salvare. An ne dess nia le tó sön le brac y gnanca ti fá massa aicia. Al sá pa bëgn da se defëne, cun dënz y grifes, sce al vëgn massa sceché sö.

Pacho á sëgn n ann y da d'altonn saral ciamó massa pice da sté da su sön la munt, porchël podaral ciamó passé n invern tl garage dla familia Oberhofer y l'ann do, canche al sará spo maiú, podaral jí a se chirí d'atres muntagnoles, mëte sö familia y vire impara tla bela natöra.  (kp)