La Usc di Ladins

L’ann passé d’agost él sté Al Plan y San Martin che á ciafé sciöche pröma destinaziun turistica de Südtirol la zertificaziun GSTC (Global Sustainable Tourism Council), che stá por n turism ót devers la sostenibilité. Al é noela da incö che sëgn l’á ciafada ince l’Alta Badia. "I sun sön la dërta strada: l’Alta Badia á ciafé la zertificaziun GSTC y é destinaziun sostenibla" scrí la Cooperativa Turistica te n comunicat, injuntan che "Ciafé n te reconescimënt n’é nia ma motif de gran sodefaziun, mo é ince n impuls por jí inant tla direziun dla sostenibilité deboriada cun düc os. Al é pormó le mëteman de n tru lunch: le fajun deboriada."
Zertificaziun sciöche n mëteman, dij le comunicat. Deache al stará sëgn ales localités da implí la merscia cun provedimënc y orientamënc concrec, che vá devers la sostenibilité: ambientala, soziala, culturala, economica.   (pablo)