La Usc di Ladins

Iac, cunici, cians, cioures, vaces, mo ince igli, schirates y arosć. L'assoziaziun »Sconanza di tiers«, o »Tierschutz« sciöche an ti dij por todësch, se tol a cör le bëgnester de düc i tiers, de dötes les creatöres che á debojëgn de aiüt. Ara se trata de na uniun che vëgn portada inant da volontars, che dedichëia gran pert de so tëmp lëde ai tiers, mo che ne l'á nia dagnora saurida. Ince sce les porsones mostra incö plü sensibilité por i tiers y sce al é leges y normes che prevëiga sanziuns por chi che i maltratëia, él tres ciamó jënt che fej burt impara, che n'á nia respet. I respeté ne ó nia ma dí i ojoré y ti de n tët sura le ce. Al ó ince dí ti garantí n ambiënt olache ai pó se sté saurí, olache sü bojëgns vëgn consciderá y olache al vëgn ciaré de süa sanité. La seziun dla Val Badia y de Puster dla »Sconanza di tiers« ê gnüda metüda sö dala notara Ida Tratter da Bornech y spo surantuta da Leutraude Bauer da La Pli. Da cater agn incá él Petra Alfreider a ce dla assoziaziun.

Massa iac sön i lüsc da paur
Le iat é le tier por chël che la »Sconanza di tiers« vëgn cherdada plü gonot. Al é dër important – sciöche Petra alza fora plü y plü iadi tratan l'intervista – che al vëgnes sterilisé les iates y castré i iac. Iac él dër tröc incërch, propi deache les nasciüdes ne vëgn nia controlades; les iates ne vëgn nia sterilisades y i iac nia castrá. Mo canche al n'é inurcaltan de massa ne san nia plü ci fá impara. Les strotöres che i tol sö é bele scialdi plënes y insciö sozedel che – dantadöt i pici – vëgnes copá. Chësc sozedô dër gonot inlaôta, canche al ne ê nia tan saurí da sterilisé les iates. »Aldedaincö él vigni dotur dai tiers che sterilisëia, porchël ne él nia vertores«, dij Hermine Neumaier da Corvara, che laora da 25 agn incá sciöche volontara pro la »Sconanza di tiers«: »Inlaôta messânse condüje les iates cina a Balsan, tla Sill (Strotöra sanitara cun alberch por tiers, ndr) por les sterilisé y do da n valgügn dis podônse spo indô jí a s'les tó«, cúntera.

Deplü podëise lí tla ediziun stampada de nosc foliet, che vëgn fora en vëndres ai 23 de setëmber  (kp)