Gas y strom: les bolëtes vëgn tres plü ceres

Data

29 de setember 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Da de a de crësc i prisc dl'energia y les bolëtes vëgn tres plü ceres. L'aumënt di prisc atoca ince le setur turistich, dla hotelaria y dla restoraziun y jí en vacanza costa tres deplü. I nen un baié cun Iwan Costamoling, surastant dla Lia di Ostis/Hgv da Corvara
Bele sëgn pësa i aumënc di cosć dl'energia sön la vita da vigni de y la sajun frëida n'á nia ciamó scomencé. Sciöche düc i seturs é ince chël turistich y dla hotelaria dassënn atoché da chisc aumënc, che se damana n adatamënt di prisc. Jí en vacanza vëgn insciö, indlunch, plü cer. An aspeta che al röies aiüc da pert dl Stat y le presidënt dla Hgv dl Südtirol, Manfred Pinzger, s'á lascé adintëne, tres na videoconfënza, pro le minister por le svilup economich Giancarlo Giorgetti. Pinzger ti á fat al Minister ejëmpli concrec: na ütia da munt spenô d'agost dl 2021 chi 3.000 euro de energia, cosć che amuntâ sö en chësc ann d'agost a 8.000 euro; te n hotel da cater stëres é i cosć dl'energia passá da 25.000 euro (agost 2021) a 80.000 euro (agost 2022). »La politica nazionala mëss assolutamënter salté ite por afronté chisc aumënc estrems y evité che strotöres mësses smendrí i sorvisc che ai pita o cinamai stlü«, á dit Pinzger. Do da na buna sajun da d'isté,che s'á stlüt jö da püch, mët i ostis sëgn man da ponsé ala al'invern. Co éra pa cun les prenotaziuns y ci dij pa i ghesć di aumënc di prisc? I ti l'un damané a Iwan Costamoling, presidënt dla Lia di ostis/Hgv da Corvara.

La Usc: Iwan, co ciara pa fora les prenotaziuns por l'invern?
Iwan Costamoling: I pó dí che al momënt vëgnel ite tröpes prenotaziuns, insciö ái ince aldí da mi colegs. Chësc nes fej ponsé che al podess garaté na buna sajun da d'invern, ince deache la jënt á indô vëia da jí en vacanza do da dui agn de pandemia.

De ci nazionalité é pa i ghesć che prenotëia?
Prenotaziuns röiel da döt le monn, dal'Olanda, Germania, Svizera, Inghiltera, dal'Europa dl Nord, mo ince dal'atra pert dl monn, dala America y dal'Australia.

Deplü tla ediziun d'La Usc da en vëndres ai 30 de setëmber. 
 (kp)