Le de dla creaziun
Sön plaza de dlijia da Corvara él gnü tigní le de dla creaziun. I mituns y les mitans á podü porté adalerch tiers, plantes y früc dla tera, che é gnüs contemplá y benedis da Siur Andreas Perathoner
Por le cuarto ann indolater, sön scomenciadia de Siur Andreas Perathoner, á le Grup Liturgich por i Mituns da Corvara y Calfosch, metü a jí la liturgia dla parora por la benedisciun dla creaziun. En lönesc ai 19 de setëmber dales trëi domisdé se á tröpa jënt abiné sön plaza de dlijia por rengrazié dles gran scincundes dla natöra. Por l’ocajiun é iac, cians, cunici, ponjins y iarines gnüs portá dai mituns adöm cun les plantes y i früc dla tera. Tl zënter an orü mëte dantadöt i mituns y les mitans, la pert plü bela de nosta creaziun. An á insciö orü porvé da i sensibilisé da ti orëi bun a döta la natöra y da descedé te ai la misciun de sconanza, che düc messass se tó dant, sëgn y tl dagní. Do na picera prozesciun él gnü recordé i vari plü importanc fora dla Bibia che cunta dla creaziun. I mituns y les mitans dla scora elementara á porté sü dessëgns che é gnüs tacá sö sön na gran tofla da odëi te dlijia. La funziun é gnüda abelida cun val ciantia acompagnada dal sonn dla chitara. Ala fin á Siur Andreas ciamó cherdé jö la benedisciun dal Alt sön i presënc y sön döt ci che é gnü porté. Stlüta ia la funziun, á i mituns y les mitans podü se tó jö de mësa poms, res ghei, sonjins y partí cun cumpagns i pans benedis.
Galaria retrac
View the embedded image gallery online at:
https://www.lausc.it/valedes-ladines/val-badia/21094-le-de-dla-creaziun#sigProIdbab22a62e3
https://www.lausc.it/valedes-ladines/val-badia/21094-le-de-dla-creaziun#sigProIdbab22a62e3