La Usc di Ladins

Chësta domënia ai 6 de novëmber danmisdé é gnüda scassada sö da n inzidënt sozedü a Al Plan de Mareo. Defata do la mesa dles 10 ê n berba de passa 90 agn sön tru da jí jö por paisc. Dan la burcia dlungia Hotel Brunella y Residence Clara ál passé ia la strada - al ê chi pêr de metri dan les strisciores zebra - y iló éra sozedüda. N auto che gnô adalerch tla direziun cuntra Runcac ti é rové ados, tan che l’ël é tomé sön strada. Söl post él defata rové i volontars dla Crusc Blancia Mareo y i Carabiniers d’Al Plan. Te n secundo momënt él gnü cherdé pormez le dotur d’emergënza. Insciö ti él gnü pité al berba les prömes cures. Püch dedô él ince gnü cherdé le joler Pelikan 2, che á ciarié le ferí y l’á joré tl ospedal da Balsan cun n politrauma. I Carabiniers ará le compit da inrescí la dinamica. Danter les gaujes él da stlü fora chëra dla velozité, nes dij les forzes dl ordinn, gnô pö l’auto da paîsc sö y â pormó ót ite do la burcia. Al berba ti fajunse les mius aodanzes de varijun.  (pablo)